ხონის, წყალტუბოს, ვანის, ზუგდიდის და სამტრედიის ქალთა მხარდაჭერის ცენტრების ქალებთან ქალთა ფონდი „სოხუმის“ ფსიქოლოგმა ონლაინ გამართა სამი ინდივიდუალური და ორი ჯგუფური შეხვედრა. შეხვედრის პროცესში მონაწილეები გამოირჩეოდნენ აქტიურობით, გულახდილობით, გამოხატავდნენ ნდობას. ისინი ხმამაღლა საუბრობდნენ არსებულ პრობლემებზე და ითვალისწინებდნენ მათთვის მიცემულ რჩევებს.
საკმაოდ რთული ქეისებია ვანისა და სამტრედიის მუნიციპალიტებებში. აღინიშნა, რომ მათ ოჯახებში შეინიშნება ძალადობის ზრდის ტენდენცია, აქვთ ურთიერთობების პრობლემები. ერთ-ერთ ქალს, რომელიც სახლიდან წავიდა, საკუთარი ოჯახის წევრები აიძულებენ, რომ დაბრუნდეს ქმართან ცნობილი მოტივით: „რას იტყვის ხალხი?“, „სირცხვილია“, „მოგვეჭრა თავი“ და ა.შ.
ახლოვდება ახალი წელი და ქალები ცდილობენ პოზიტიურად, იმედით და სიხარულით შეხვდნენ 2025 წლის შემობრძანებას.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
გოგოლესუბანი - არის ასეთი პატარა სოფელი ჩოხატაურის მუნიციპალიტეტში. აქაური ქალების თხოვნით, ჩვენმა ორგანიზაციამ ჩამოაყალიბა ჭრა-კერვის კურსები და მასწავლებლად მოიწვია მათი თანასოფლელი მკერავი ნანა გოგოლაძე.
ქალებმა დიდი მონდომებით გაიარეს ორთვიანი საბაზისო კურსი. ყველა მათგანი კმაყოფილია მიღებული ცოდნით და კურსების გაგრძელებას ითხოვენ.
ბოლო მეცადინეობაზე კურსდამთავრებულების ნამუშევრების გამოფენა მოეწყო და მათ სერტიფიკატები გადაეცათ.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ფორუმ-თეატრმა დეკემბრის გამოსვლები მიუძღვნა საერთაშორისო კამპანიას „16 აქტიური დღე ქალთა მიმათ ძალადობის წინააღმდეგ“. წარმოდგენები ჩატარდა ქუთაისის ახალგაზრდულ ცენტრში და ღია ცის ქვეშ.
საერთო სიტუაციიდან გამომდინარე, შეზღუდულია გასვლები მუნიციპალიტეტებში, სკოლებში, ამიტომაც წლის ბოლო წარმოდგენები მხოლოდ ქუთაისელი მაყურებლისთვის გაიმართა.
მსახიობები იმედოვნებენ, რომ ახალი წლიდან მდგომარეობა უკეთესობისკენ შეიცვლება და მათი გამოსვლების გეოგრაფიაც უფრო მრავალფეროვანი იქნება.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქალთა მხარდაჭერის ცენტრები აქტიურად ჩაერთნენ საერთაშორისო კამპანიაში „16 აქტიური დღე ქალთა მიმართ ძალადობის წინააღმდეგ“. ცენტრების მობილიზატორების ინიცირებით გაიმართა სხვადასხვა ფორმატის აქტივობები: დისკუსია-დებატები, ნახატების გამოფენები, ფილმის ჩვენებები, პრეზენტაციები. ერთმნიშვნელოვნად აღინიშნა, რომ ქალთა მიმართ ძალადობა გლობალური პრობლემაა და საზოგადოებამ უნდა გამოხატოს პროტესტი მის მიმართ.
16-დღიანი კამპანია 25 ნოემბრიდან 10 დეკემბრამდე მიმდინარეობდა და მასში ქალთა მხარდაჭერის ათივე ცენტრი მონაწილეობდა.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქალთა ფონდი „სოხუმი“ 2001 წლიდანაა ჩართული საერთაშორისო კამპანიაში „16 აქტიური დღე ქალთა მიმართ ძალადობის წინააღმდეგ“. წელს განსაკუთრებით იაქტიურეს ახალგაზრდებმა. ახალგაზრდობის გაძლიერების ცენტრებმა ინიცირებული ღონისძიებები ჩაატარეს ზუგდიდის, სენაკის, სამტრედიის, წყალტუბოს და თერჯოლის მუნიციპალიტეტებში. მათ გაცნობიერებული აქვთ თავიანთი წილი პასუხისმგებლობა არაძალადობრივი გარემოს ფორმირებაში.
გეგმით გათვალისწინებული იყო 30-მდე ღონისძიების ჩატარება, მაგრამ ქვეყანაში შექმნილი რთული პოლიტიკური მდგომარეობიდან გამომდინარე, კამპანიამ მასშტაბური ხასიათი ვერ მიიღო.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ახალგაზრდების გაძლიერების ცენტრებში დასრულდა სატრენინგო კურსი. შემდეგი ხუთი ტრენინგი გაიმართა ქობულეთში, თერჯოლაში, წალენჯიხაში, სენაკსა და ხობში მცხოვრებ ახალგაზრდებთან.
ყველა ცენტრი აქტიურად ჩაერთო საერთაშორისო კამპანიაში „16 აქტიური დღე ქალთა მიმართ ძალადობის წინააღმდეგ“. მათ დაგეგმეს 30 ღონისძიება კამპანიის ფარგლებში. ახალგაზრდების ინიცირებულ აქტივობებში სულ უფრო მეტი და მეტი ადამიანი ერთვება. ეს კარგი საშუალებაა ინფორმაციის გავრცელებისთვის და სტიმულის მოცემია ახალგაზრდებისთვის.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
- მადლობა თქვენი საქმიანობის შედეგების წარმოდგენისთვის. ახლა იმაზე მეტად ხართ თქვენი საქმის ერთგულები, ვიდრე მანამდე იყავით. აღფრთოვანებული ვარ თქვენი მოტივაციით და სულისკვეთებით. თქვენ მუშაობთ არა მარტო თქვენი ბენეფიციარებისთვის, არამედ მთელი ქვეყნისთვის. მიხარია, რომ ჩვენ თქვენი პარტნიორები ვართ. მადლობა პარტნიორობისთვის, - აღნიშნა შეხვედრის ბოლოს კიმ კვიბუკამ, ჩვენი დონორი ორგანიზაციის Brot für die Welt წარმომადგენელმა.
შეხვედრაზე პროექტის მონაწილეებმა სხვადასხვა კუთხით წარმოაჩინეს ჩვენი ამჟამინდელი საქმიანობა.
გერმანული ორგანიზაციის მხარდაჭერით ჩვენ 18 წელია, ვმუშაობთ ქალების და გოგონების გაძლიერებისთვის დასავლეთ საქართველოს მუნიციპალიტეტებში და ჩვენც მადლობას ვუხდით მრავალწლიანი ნაყოფიერი პარტნიორობისთვის.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ძალადობის პრობლემების ადრეული გამოვლენა ქალთა მხარდაჭერის ცენტრების საქმიანობაში მნიშვნელოვან სტრატეგიად რჩება. იდენტიფიცირების კვალდაკვალ მობილიზატორები სთავაზობენ ბენეფიციარებს იმ სერვისებს, რომლებიც ძალადობის პრევენციას ემსახურება.
თვის განმავლობაში საინფორმაციო შეხვედრებში 150-ზე მეტი ქალი იყო ჩართული და 10-ზე მეტი კრიზისული ოჯახის იდენტიფიცირება მოხდა. ფსიქოლოგის ჩართულობა ეხმარება მათ, დაძლიონ პრობლემები და ცხოვრება უკეთესობისკენ შეცვალონ. ქალთა ფონდი „სოხუმის“ სარეაბილიტაციო ცენტრის სერვისით ექვსმა ადამიანმა ისარგებლა, რაც მათ ცხოვრებაში პოზიტიურ ცვლილებებს იწვევს.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ერთ პატარა სოფელში არის ბიჭუნა, რომელიც მთელი ცხოვრება სტრესში იზრდებოდა. დიდი ოჯახი ჰქონდა, მაგრამ ძმებთანაც ვერ ახერხებდა ურთიერთობას. ჩაკეტილობა მისთვის თითქოს დამცავ კედლად იქცა, რომლის მიღმაც თავის ტკივილს და ემოციებს მალავდა.
ერთ დღეს ბიჭუნა, მისი დედა და ძმები ქალთა ფონდი „სოხუმის“ სარეაბილიტაციო ცენტრში მოხვდნენ.
დედასთან და სხვა ქალებთან მუშაობდნენ ფსიქოლოგი, სოციალური მუშაკი, იურისტი, ბიჭუნა კი დიდ დროს ატარებდა პედაგოგთან.
არასრულწლოვნებთან მუშაობის ასისტენტი-პედაგოგი ანა ლომიძე იხსენებს: „პირველივე შეხვედრაზე თვალში მომხვდა მისი დუმილი და სევდიანი თვალები. პატარა ნაბიჯებით დავიწყეთ, მცირედიდან. ვთამაშობდით, ვმეცადინეობდით, ვხატავდით. სხვადასხვა აქტივობის შედეგად მასში ცნობისმოყვარეობამ გაიღვიძა. ძმებთან კომუნიკაცია დაიწყო. ორკვირიანი სარეაბილიტაციო პროგრამის დასრულების შემდეგ უკვე აქტიური, ძლიერი და თავდაჯერებული იყო. წინ ახალი გამოცდა ელოდა - სასკოლო ოლიმპიადა. ადრე უარს იტყოდა მონაწილეობაზე, ახლა კი ბიჭი ჩაერთო და პირველი ადგილიც აიღო. ეს დიდი გამარჯვება იყო მისთვის.
ეს ისტორია ერთ-ერთია მრავალთაგან, რაც ჩვენთან ხდება არასრულწლოვნებთან მუშაობის დროს. ყველა ბავშვი, რომელიც აქ მოდის, გადაწყვეტს, რომ არასდროს დაუბრუნდება წარსულს, სადაც დედასთან ერთად ისიც მსხვერპლი იყო. სარეაბილიტაციო ცენტრში დაბადებული გამარჯვება ახალი წარმატებების საწინდარი ხდება.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქალთა ფონდი „სოხუმი“ წარმოგიდგენთ ახალი მონიტორინგის მოკლე ანგარიშს - „ძალადობაგამოვლილი ქალების მიერ მხარდაჭერის სერვისების არჩევისა და შეფასების კრიტერიუმები: ეფექტიანობა და საჭიროებებზე მორგებულობა“. კვლევის ამ ანგარიშში ასახულია ქალების დამოკიდებულება მხარდაჭერის სერვისების ეფექტიანობის მიმართ, თუ რამდენად მორგებულია ძალადობამგამოვლილი ქალებისთვის განკუთვნილი სერვისები მათ საჭიროებებზე, და ის, თუ რა კრიტერიუმებით ხელმძღვანელობენ ისინი მომსახურების არჩევისას და შეფასებისას.
კვლევის მიგნებებით, რესპონდენტთა უმრავლესობა, დაცულობისა და ეფექტიანობის თვალსაზრისით, უპირატესობას ანიჭებს არასამთავრობო ორგანიზაციებს. ადგილობრივი ხელისუფლება და პოლიცია შედარებით დაბალ, თუმცა არცთუ მცირე მაჩვენებელს ავლენს დაცულობის და გამოწვევებთან გამკლავების თვალსაზრისით. მომსახურების ხარისხის გაუმჯობესების მიზნით, კვლევაში შეფასებულია სერვისების მიმწოდებლები ისეთი მახასიათებლების მიხედვით, როგორიცაა ხელმისაწვდომობა, მოქნილობა, კოორდინაციის უნარი და ა.შ.
დოკუმენტი ეფუძნება ფონდი "სოხუმის" მიერ 2024 წლის მაის-ოქტომბრის პერიოდში ჩატარებულ თვისობრივ და რაოდენობრივ კვლევას, რომლის ფარგლებში გამოიკითხა 600-ზე მეტი რესპონდენტი, 11 სამიზნე მუნიციპალიტეტიდან: ჩოხატაური, ქობულეთი, წყალტუბო, ქუთაისი, ხონი, თერჯოლა, სამტრედია, სენაკი, ზუგდიდი, წალენჯიხა და ხობი.